Bata patay, 1 kritikal  sa landslide sa Mandaue

CEBU CITY – Patay na nang mahukay ang 13-anyos lalaki makaraang matabunan kasama ang kanyang kapatid makaraang bumagsak ang riprap sa Villa San Sebastian Subdivision sa Sitio Kalubihan, Brgy. Casili sa lungsod ng Mandaue kamakalawa.

Kinilala ang namatay na si Vicente Cariquitan Jr., habang isasailalim sa operasyon ang 3-anyos niyang kapatid na si Vladimir.

Bandang 9 p.m. nang magsimulang hukayin ng Mandaue City Disaster Risk Reduction Management Office, Bureau of Fire Protection at barangay rescuers ang magkapatid at bandang 2 a.m. kahapon nang sila ay matagpuan.

Ang nakakatandang kapatid ng mga biktima na si Ericson ay nasa ibang bahay at wala ang kanilang mga magulang nang maganap ang insidente.

Sinasabing namalayan na lamang nila ang pagbagsak ng riprap kaya mabilis silang tumakbo papunta sa kanilang bahay.

Kasabay nang pagbagsak ng riprap ay nahila niya ang 3-anyos kapatid na natabunan din ng lupa.