2 pusher todas sa shootout sa Kyusi

PATAY ang dalawang hinihinalang drug pusher na mga miyembro ng Samuel drug group na kumikilos sa Quezon City makaraang makipagbarilan sa mga operatiba ng Quezo City Police District – District Anti-Illegal Drugs (QCPD-DAID) sa buy-bust operation sa lungsod kahapon ng madaling araw.

Sa ulat kay Chief Supt. Edgardo Tinio, QCPD Director, kinilala ang mga napatay na sina alyas Alvin at alyas Mar.

Ayon kay Chief Insp. Enrico Figueroa, hepe ng DAID Special Operations Task Group, dakong 4 a.m. nang maganap ang shootout sa kanto ng Mindanao Avenue at Belfast St. Regalado, Brgy. Greater Fairview.

Aniya, nakatanggap ang kanyang tanggapan ng impormasyon hinggil sa ilegal na aktibidades ng sindikatong tinaguriang Samuel drug group.

Agad nagsagawa ng buy-bust operation ang tropa ni Figueroa at sa aktuwal na transaksiyon ay nakaamoy ang mga suspek sa police operation kaya sila ay nanlaban ngunit gumanti ng putok ang mga awtoridad, nagresulta ito sa pagkamatay ng dalawang salarin.