Malampaya fund may natitira pang P167-B — DoE

INIHAYAG ni Department of Energy (DoE) OIC Zenaida Monsada, may natitira pang P167.2 bilyon sa Malampaya funds sa kasalukuyan.

Sa pagtatanong ng mga kongresista, inihayag ni Monsada na bawas na sa balanseng ito ang settlement ng tax defficiency.

Ngunit sa kabuuan, mula noong Enero 2002 hanggang nitong Marso 2015 ay umabot na sa P213.2 bilyon ang royalties na nakolekta ng gobyerno mula sa Malampaya natural gas project.

Sa halagang ito, P43.7 bilyon na ang nagastos hanggang noong 2013 samantala walang disbursement sa Malampaya funds noong 2014 hanggang ngayong 2015.

Sinabi ng DoE, huling nagkaroon ng disbursement dito noong taon 2013.

Marami ang kumuwestyon sa mga pinagkagastusan noon ng pondo dahil walang koneksiyon sa energy development projects labag sa itinatakda ng batas.

Samantala, inihayag din ni Monsada na umabot ng P7 bilyon ang nakolekta ng Meralco sa consumers nito mula sa pinakamataas na power rate hike nito noong bago magtapos ang 2013 o bago na-TRO ng Korte Suprema.