Babaeng curfew violator ginahasa ng pulis-Bulacan

NAHAHARAP sa kaso at posibleng masibak sa puwesto ang isang pulis matapos akusahang nanggahasa ng isang babae sa bayan ng San Miguel, sa lalawigan ng Bulacan.

Sa ulat mula kay Region 3 Police Director Gen. Valeriano de Leon, kinilala ang suspek na si P/Lt. Jimmy Fegcan na miyembro ng San Miguel Municipal Police Sation (MPS).

Inakusahan si Fegcan ng isang 24-anyos babae ng panghahalay na sinasabing naganap nitong Miyerkoles, 28 Oktubre.

Napag-alamang inaresto ng suspek na pulis ang biktima dahil sa paglabag sa curfew noong madaling araw ng Miyerkoles pero imbes dalhin sa presinto at kasuhan ay ginahasa niya sa kanilang barracks.

Nakakulong na sa San Miguel MPS si Fegcan at nakatakdang hainan ng kasong paglabag sa RA 8363 o Anti-Rape Law.

MICKA BAUTISTA