CamSur ex-mayor sabit sa fertilizer scam

SINAMPAHAN nang patong-patong na kaso ng Office of the Ombudsman sa Sandiganbayan ang ilang dating lokal na opisyal sa Talisay, Camarines Norte kaugnay ng fertilizer fund scam.

Kabilang sa mga kinasuhan si dating mayor Rodolfo Gache; gayondin sina Cecilio Noora, Jr., Miriam Hernandez, Ireneo Zabala, Romeo Maranan, Felicisima Velasco, Raul Rayos at Adela Adlawan.

Dalawang bilang nang paglabag sa Section 3(e) ng Anti-Graft and Corrupt Practices Act (Republic Act No. 3019) at Malversation of Public Funds ang kinakaharap ng mga akusado, habang damay din sa reklamo sina Hexaphil Agriventures president Alex Rivera at Victoria Ajero.

Lumalabas sa record noong 2004, ang bayan ng Talisay ay nakatanggap ng halos P3 milyon bilang beneficiary ng Farm Inputs and Farm Implements Program (FIFIP) ng Department of Agriculture (DA).

Bilang implementasyon ng proyekto, inaprubahan ni Gache at iba pang mga opisyal ang pagbili ng 4,285 bote ng Hexaplus liquid fertilizer sa halagang P700 kada bote mula sa Hexaphil.

Sa imbestigasyon, natuklasang walang nangyaring public bidding at inaprubahan ang paglalabas ng pondo sa loob lang ng isang araw.

Nabatid na overpriced ang mga produkto kung ihahambing sa ibang brand name na may kaparehong laman.

Nasa P130 lang ang kada bote nito sa merkado, ngunit mas pinili ng Talisay officials ang higit na mahal na uri ng fertilizer na nagkakahalaga ng P700.