Retiradong parak, patay nang mahagip ng kaanak ni Pacman

GENERAL SANTOS CITY – Kinasuhan ng reckless imprudence resulting in homicide ang isa sa kamag-anak ni Senator-elect Manny Pacquiao makaraan mapatay sa bundol ang isang retiradong pulis sa minaneho niyang motorsiklo.

Kinilala ang biktimang si retired SPO4 Angel Clerino, residente ng Lanton, Apopong, habang ang suspek ay si Marcelo Pacquiao.

Sa imbestigasyon ng Makar Police station, nagkasalubong ang dalawang kapwa lulan ng motorsiklo sa national higway ng Brgy. North kaya’t nahagip ang paa ng biktima na ikinaputol nito.

Sinasabing nakainom si Marcelo nang mangyari ang insidente.

Binawian ng buhay ang dating pulis ilang sandali makaraan dumating sa ospital.

Lumabas sa imbestigasyon ng pulisya, kapwa mabilis ang takbo ng dalawang motorsiklo.