K-12 program ng DepEd ‘di basta maibabasura

DAGUPAN CITY – Iginiit ng Department of Education (DepEd) Dagupan, hindi basta matatanggal ang implementasyon ng K-12 Program ng ahensiya sa kabila ng pahayag ni President-elect Rodrigo Duterte na nais niyang alisin ang naturang programa.

Ayon kay Madam Maria Linda Ventinilla, hepe ng School Governance and Operations Division ng DepEd Dagupan, nakapaloob sa isang batas ang K-12 Program kaya’t hindi ito madaling buwagin ng sino man kahit pa ang susunod na pangulo.

Paliwanag niya, may tamang prosesong dapat pagdaanan bago maipatigil ang implementasyon ng programa lalo’t pinag-aralan itong mabuti bago naipasa.

Dahil dito, nanindigan ang opisyal na magpapatuloy pa rin ang kanilang paghahanda dahil makatutulong ito sa edukasyon ng mga kabataan sa Filipinas.