5 patay sa salpukan ng 2 motorsiklo

CAUAYAN CITY, Isabela –  Lima katao ang namatay sa salpukan ng dalawang motorsiklo sa national highway ng Burgos, Alicia, Isabela.

Magkaangkas sa isang motorsiklo ang dalawang biktimang sina Richard Toquero, 20, at Roy Allan Randicho, 31, kapwa residente ng Mabini, Alicia, Isabela.

Habang sakay nang nakabanggaan nilang motorsiklo sina Fredelino Ramos, 48, residente ng District 3, Cauayan City; Analyn Abuan, 36, residente ng San Fermin, Cauayan City, at isang hindi nakilalang lalaki.

Sa imbestigasyon ng Alicia Police Station, binabagtas ng dalawang motorsiklo ang magkasalungat na direksyon nang umagaw ng linya ang motorsiklo na minamaneho ni Toquero, dahilan nang pagsalpok sa kasalubong na motorsiklo.

Dahil sa lakas ng banggaan ay agad binawian nang buhay ang apat na lalaki habang si Abuan ay pumanaw sa ospital.