Kelot naglinis ng balon nalunod

LA UNION – Nalunod ang isang 36-anyos lalaki  habang nililinis ang isang balon sa lungsod ng San Fernando, La Union kamakalawa.

Kinilala ang biktimang si Michael Pimentel, residente ng Brgy. Cabaroan.

Batay sa salaysay ng kanyang mga kasamahan, ipinatawag sila kahapon ng kanilang kamag-anak na si Edna Fusilero upang maglinis sa loob ng balon na may lalim na 30 hanggang 40 talampakan.

Habang nasa loob ng balon ang biktima ay napansin na lamang ng mga kasama niya na hindi na gumagalaw ang lubid na nakatali sa kanyang beywang at hindi na rin umiimik.

Agad sumaklolo ang mga tauhan ng Provincial Disaster Risk Reduction and Management Council (PDRRMC) hanggang maiahon ang biktima makalipas ang isang oras.

Dinala siya sa Ilocos Training and Regional Medical Center (ITRMC) ngunit idineklarang dead on arrival.

Ayon sa doktor, namatay ang biktima dahil sa respiratory arrest secondary to drowning.

Sinasabing lasing ang biktima nang lumusong sa balon.