P10 rollback sa pasahe ipinababawi ng taxi ops

IPINABABAWI ng grupo ng taxi drivers ang ipatutupad ng Land Transportation and Franchising Regulatory Board (LTFRB) na P10 rollback sa singil sa pamasahe.

Nais din hadlangan ng transport groups ang bagong ipatutupad na distance charge na P3.50 bawat 500 meters at P3.50 sa 90 seconds na waiting time dahil sa patuloy na pagtaas ng presyo ng mga produktong petrolyo

Habang gagawing P60 lamang ang flagdown rate sa mga airport taxi at gagawing permanente rin sa P4 ang singil sa waiting time bawat 90 seconds.

Inirereklamo rin ng taxi drivers at operators ang UBER na anila’y kanilang ilegal na kakompetensya dahil wala itong pormal na prankisa.

Sinabi ni Board Member Ariel Inton, walang dapat ireklamo ang taxi operators at drivers dahil sa katunayan aniya noong nakaraang taon pa ipinatupad ang P10 rollback sa singil ng pamasahe sa mga taxi.

Maging ang bagong rates aniya sa distansya at wating time ay hindi rin sa ngayon dapat problemahin dahil magsisimula pa raw ang pagpapatupad nito sa Abril kapag tapos nang ma-calibrate at maselyohan muli ang metro ng mga taxi.

Sa Marso 19 nakatakdang maging permanente ang provisional P30 flagdown rate mula sa dating P40 flagdown rate sa lahat ng mga taxi sa bansa maliban sa CAR.