HATAW! D'yaryo ng Bayan hatawtabloid.com
KUNG sakaling makakabawi pa ang Alaska Milk sa tatlong sunod na kabiguang sinapit nito sa kamay ng San Miguel Beer at mapapanalunan pa rin ang kampeonato ng PBA Phiilippine Cup, siguradong si Vic Manuel ang maitatanghal na Most Valuable Player of the Finals.
Wala nang ibang manlalaro ng Alaska Milk ang nakikitang puwedeng sumilat kay Manuel na siyang naging Best Player ng unang tatlong laro ng serye na napanalunan ng Aces.
Ang tanong: Sino naman ang magiging MVP of the Finals sakaling makumpleto ng Beermen ang historic comeback at magkampeon?
Dito sasakit ang ulo ng mga miyembro ng PBA Press Corps na siyang pipili ng pararangalan.
Kasi naman ay iba-iba ang naging bida ng San Miguel sa tatlong panalong naitala nito para maitabla ang serye.
Sa Game Four, si Chris Ross ang naging Best Player matapos na muntik makabuo ito ng triple double. Nagtapos si Ross nang may 11 puntos, 12 rebounds at siyam na assists.
Sa Game Five ay si Arwind Santos naman ang naging Best Player nang gumawa ito ng 22 puntos, 16 rebounds, apat na assists, apat na supalpal at tatlong steals.
Sa Game Six ay si Marcio Lassiter naman ang pinanggalingan ng firepower ng Beermen nang gumawa ito ng 26 puntos kabilang na ang apat na three-point shots.
Kung titignang maigi, iba-iba ang pinangalingan ng kabayanihan upang matulungan ang kanilang main man na si June Mar Fajardo na hindi pa 100 percent buhat nang magtamo ng kapansanan sa tuhod.
Dahil sa nakapagpahinga ang dalawang teams ng limang araw mula nang maglaro sa Game Six noong Biyernes, inaasahang mapapakinabangan na nang husto si Fajardo bukas sa wiinner-take-all Game Seven. Malay natin at baka si Fajardo naman ang maging Best Player sakaling manalo nga ang Beermen.
E di iba-iba nga ang nagbida. Sino ang pipiliin ng PBA Press Corps upang magwagi bilang Cignal MVP of the Finals?
Mahirap, hindi ba? Unless na may makaulit bilang Best Player sa Game Seven para sa Beermen.
Pero siyempre, sinasabi ng mga taga-Alaska, “Para huwag na kayong mahirapang mamili, kami na lang ang magkakampeon at si Manuel na nga ang MVP!?”
Tignan natin.
SPORTS SHOCKED – Sabrina Pascua
