This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
PITONG kababaihang pinaniniwalaang mga biktima ng ‘human trafficking’ ang nailigtas ng mga tauhan ng Bureau of Immigration (BI) sa Zamboanga City International seaport.
Ayon kay BI Commissioner Ronaldo Geron, namataan ng BI inspectors ang nasabing mga biktima na patungo sa Sandakan, Malaysia.
Sa impormasyon, tangkang ilusot ng sindikato sa pantalan ang nasabing mga biktima, pero nagduda ang mga tauhan ng Immigration Travel Control and Enforcement Unit (TCEU) sa dokumentong ipinakita nila.
Sa puntong ito, natuklasang kuwestiyonable ang mga papeles ng mga biktima kung kaya’t isinailalim sa interogas-yon hanggang makompirmang biktima sila ng human trafficking.
Dahil sa insidente, iniutos ni Geron sa kanyang mga tauhan sa Zamboanga City International Seaport na mahigpit na ipatupad ang pagsisiyasat sa mga papeles ng mga Filipino na palabas ng bansa.
