HATAW! D'yaryo ng Bayan hatawtabloid.com
CAUAYAN CITY, Isabela – Isinugod sa ospital ang isang lalaking maysakit para masagip ang buhay ngunit namatay din kasama ang kanyang misis at isa pang kamag-anak nang sumalpok sa bus ang sinasakyan nilang tricycle kamakalawa.
Biktima ang driver ng tricycle na si Bernardo Saguiped, 47-anyos, at ang mag-asawang Rosalinda at Ricardo Malapit, pawang residente sa Brgy. Flores, Naguilian.
Sugatan ang nakasakay sa likod ng driver na si Ernesto Duque, 45-anyos, residente rin sa Brgy. Flores, kapatid ni Rosalinda Malapit.
Sinabi ng driver ng Dalin Liner Bus (body number 722 at plate number BVC 211) na si Domingo Cabalonga, 58, residente ng San Fermin, Cauayan City, sinikap niyang iwasan ang tricycle ngunit nabangga pa rin niya.
Lumabas sa pagsisiyasat ng Naguilian Police Station, ang bus ay patungong Metro Manila habang patungo ang tricycle sa Lunsod ng Ilagan para dalhin sa Governor Faustino N. Dy Memorial Hospital si Ricardo Malapit dahil hindi makahinga sanhi ng pagsumpong ng kanyang sakit na asthma.
Nilampasan ng tricycle ang sinusundang sasakyan at umagaw ng linya kaya nasalpok ang kasalubong na bus.
