Protesta ng PH vs China sa test flight tuloy — DFA

TINIYAK ng Department of Foreign Affairs (DFA) na tuloy ang kanilang protesta laban sa China kaugnay ng test flight na ginawa ng Beijing sa artificial airstrip sa West Philippine Sea.

Magugunitang, mismong ang China ang nagkompirma na nakompleto na ng Beijing ang construction ng airfield sa Fiery Cross Reef at nagsagawa na sila ng flight testing para sa civil aviation standards.

Ngunit ayon kay DFA spokesman Charles Jose, ipoprotesta ng Filipinas ang ginawa ng China dahil ang airstrip sa Kagitingan ay bahagi ng Kalayaan Island na pag-aari ng Filipinas.

Nabatid na binatikos ng Amerika ang pagsagawa ng China ng test flight sa naturang airstrip.

Ayon sa Washington, ang ginawa ng Beijing ay lalo lang magpapalala ng tensiyon sa disputed islands.

Nabatid na lumapag ang civilian aircraft ng China sa airstrip na ginawa nito sa Fiery Cross Reef sa Spratly Islands, bagay na ikinagalit ng iba pang claimants kagaya ng Filipinas at Vietnam.

Sinabi ng US State Department, patunay lang ito na kailangan nang magkaroon ng code of conduct sa usapin ng territorial dispute sa South China Sea.

Banta raw sa ‘stability’ sa rehiyon ang ginawa ng China.

Una nang nagprotesta ang Vietnam sa naturang test flight ngunit ibinasura lang ito ng Beijing dahil wala anilang basehan.

Iginiit ni Chinese Foreign Ministry spokesperson Hua Chunying, ang ginawa ng Beijing ay ayon sa soberenya nila.