Parang “bakla” si Duterte

ANG kailangan gawin ni Davao City Mayor Rodrigo “Digong” Duterte ay manahimik, itikom ang bunganga at maging mahinahon tulad ng isang tunay na tumatakbong kandidato para sa pagkapangulo.

Ngayong ibinasura na ng Comelec ang apat na disqualification cases laban kay Duterte, dapat naman sigurong magpakita na siya ay isang disenteng kandidato. Tama na ang paggiging bastos at burabog dahil lalo lamang lumulubog ang imahe niya sa publiko.

Parang bakla na kasi si Duterte.  Paulit-ulit na lang ang kanyang sinasabi at kung minsan walang kawawaan ang kanyang mga binibitiwang pahayag. Diyos ko, kung bibilangin ang pauli-ulit na sinasabi niyang ipapapatay niya ang mga lumalabag sa batas, e, baka maubos na ang tao sa Filipinas.

At mantakin ba namang sabihin ni Duterte na sa loob daw ng anim na buwan, tatapusin niya ang krimen, korupsiyon at droga kung mahahahalal siya bilang pangulo? E, sino naman ang maniniwala sa kanya at mananalo naman kaya siya sa eleksiyon?

Kung susuriing mabuti, parang may “amats” na si Duterte.  Kahit walang katotohanan at imposible, basta trip niya, sasabihin niya ang kanyang gustong sabihin.

Ganyan ba ng klase ng tao na ihahalal natin sa pagkapangulo?