TR-APEC-TA’DO

INABOT na naman ng indulto ang mamamayang Filipino dahil sa maling     desisyon at ‘short-sightedness’ ng mga policy maker at decision maker sa kasalukuyang gobyerno na pinamumunuan ng natatanging anak na lalaki ng democratic icons na sina dating senador Benigno ‘Ninoy’ Aquino, Jr., at dating presidente Corazon Cojuangco Aquino.

Nag-aalborotng commuters at motorista ang numero unong biktima ng malawakang pagsasara ng major thoroughfares lalo na ‘yung mga nanggaling sa south Luzon.

Ang mga bus mula sa Cavite na dumaan sa Aguinaldo Highway ay hanggang Bacoor lamang, kaya ang commuters ay naglakad mula Bacoor, Cavite hanggang Lawton sa Ermita. Manggagawa, estudyante, empleyado, pensioners, sundalo, pulis — babae, lalaki at bata —— ang tinutukoy nating commuters. Mayroong buntis na nanganak sa Parañaque, mayroong lola na napilitang maglakad dahil kailangan niyang magpa-check-up. Maraming hindi nakapasok sa trabaho at nagsibalik na lang sa kanilang mga bahay.

Wala namang nababalita na natigok dahil sa kunsumisyon pero tiyak marami ang tumaas ang presyon at inatake ng hika dahil halos limang oras pataas ang ipinagtiis nila sa non-moving traffic sa major thoroughfares gaya sa Roxas Blvd., EDSA, Buendia, Magallanes Drive at maging sa Osmeña Highway.

Sana nga raw ay idineklara na lang na walang pasok kung nagdesisyon rin naman ang pamahalaan na isara ang malalaking kalsada.

Walang naitulong ang mga sinabi nilang Mabuhay Lane dahil sarado nga ang major thoroughfares.

Sa nakakukunsuming pangyayari nitong Lunes, iisa lang ang sentimyento ng sambayanan, hindi lang P10 bilyon ang ikinalugi ng mga Pinoy, higit pa rito dahil tinarantado ng ‘APEC’ ang traffic sa kalye.