PINANINIWALAANG nagpakamatay sa pamamagitan ng pagbaril sa sarili ang 51-anyos negosyante na dumaranas ng depresyon kaugnay ng kanyang negosyo sa Malabon City.
Natuklasan ang duguang bangkay ng biktimang si alyas Tony, 51 anyos, ng kanilang family driver na si alyas Nats sa loob ng stock room ng kanilang tirahan sa Brgy. Concepcion, may tama ng bala sa ulo dakong 5:00 pm.
Ayon kay Malabon City police chief P/Col. Jay Baybayan, hawak ng biktima ang ginamit na kalibre .22 magnum revolver na may nalalabi pang pitong bala at isang basyo sa chamber na ginamit sa pagpapakamatay.
Inamin ng asawa ng biktima sa pulisya na dumaranas ng bahagyang depresyon ang kanyang mister dahil sa kanilang negosyo.
Nakasaad sa report nina P/MSgt. Mardelio Osting at P/SSgt. Sandy Bodegon, may hawak ng kaso, isasailalim sa autopsy examination ang bangkay ng biktima upang matiyak na walang foul play sa naganap na insidente. (ROMMEL SALES)
