5 caught in the act (CIA) sa pot session

LIMA kataong hinihinalang drug personalities ang dinakip matapos mahuli sa aktong nagpa-pot session sa Valenzuela City, kahapon ng madaling araw.

Kinilala ni P/Lt. Joel Madregalejo, hepe ng Station Drug Enforcement Unit (SDEU) ng Valenzuela police ang mga suspek na sina Jerry Cabuang, 43 anyos; Ronnie Latorre, 38 anyos; Carlo Tisado, 31 anyos; Denmark Salvador, 37 anyos; at John Espinosa, 47 anyos; pawang residente ng lungsod.

Ayon kay P/SSgt. Ana Liza Antonio, nakatanggap ang mga operatiba ng SDEU ng tawag sa telepono mula sa isang concerned citizen tungkol sa illegal drug activities na nagaganap sa bahay ni Espinosa sa Malinis St., Brgy. Lawang Bato kaya’t nirespondehan ng pulisya sa pangunguna ni P/Lt. Doddie Aguirre para i-validate ang naturang report.

Pagdating sa naturang lugar dakong 1:00 am, naaktohan ng mga operatiba ng SDEU ang mga suspek na sumisinghot ng shabu sa loob ng naturang bahay.

Nakompiska sa mga suspek ang nasa limang gramo ng hinihinalang shabu, may standard drug price na P34,000, cellphone, P300 cash at drug paraphernalia.

Nahaharap ang mga suspek sa kasong paglabag sa RA 9165 o ang Comprehensive Dangerous Drugs Act of 2002. (ROMMEL SALES)