HATAW! D'yaryo ng Bayan hatawtabloid.com
TINATAYANG nasa P680,000 ang halaga ng hinihinalang shabu na nakompiska mula sa nadakip na suspek sa inilatag na anti-narcotics operation ng PDEU, PIU Pampanga PPO, at Mabalacat City Police Station, nitong Martes, 13 Abril, sa Brgy. Mabical, sa lungsod ng Mabalacat, lalawigan ng Pampanga.
Kinilala ni P/BGen. Valeriano de Leon, base sa ulat ni P/Col. Arnold Thomas Ibay, provincial director ng Pampanga PPO, ang suspek na si Alvin Guibo, alyas Alvin, 38 anyos, may asawa, kabilang sa listahan ng mga High Value Individual (HVI), residente ng Purok 1, Maluyos, Bical, sa nabanggit na lungsod.
Nakompiska mula sa suspek ang pitong plastic sachets na naglalaman ng hinihinalang shabu, may timbang na 100 gramo at nagkakahalaga ng P680,000, isang cellphone, at P1,000 marked money.
Nahaharap sa kasong paglabag sa Section 5 at 11 ng RA 9165 o Comprehensive Dangerous Drugs Act of 2002 ang suspek na nasa kostudiya ng mga naatasang raiding team. (RAUL SUSCANO)
