Sen. Trillanes ‘di patitinag vs Binay (Kahit may arrest warrant)

HINDI raw patitinag si Sen. Antonio Trillanes IV laban sa pamilya Binay kahit may warrant of arrest nang inilabas ang Makati RTC kaugnay ng kasong libel na inihain ni Makati Mayor Junjun Binay.

Ayon kay Trillanes, pinag-aaralan na ng kanyang abogado ang naturang kaso ngunit hindi siya titigil sa pag-uusig sa pamilya Binay.

“Kung ang layunin ng pamilya Binay sa kasong ito ay para tigilan ko sila sa aking pag-uusig, nagkamali sila. Hindi ko hahayaan ang mga magnanakaw na mamuno ng ating bansa,” wika ni Trillanes.

Nabatid na sinabi ni Atty. Maricel Cairo, clerk of court ng Makati RTC, magiging automatic na ang warrant of arrest makaraan makitaan ng probable cause ang kaso.

Nag-ugat ito sa expose ni Trillanes na sinasabing nasuhulan ng kampo ni Binay ng halos P50 milyon ang dalawang Court of Appeals (CA) justices na may hawak ng kaso.

Kabilang sa mga inakusahan ng pagtanggap ng suhol sina CA Justices Jose Reyes Jr., at Francisco Acosta. Sinasabing tumanggap ang mga mahistrado ng tig-P20 milyon para sa TRO at dagdag na P5 milyon nang ilabas ang injunction.

Naglabas ng warrant of arrest ang Makati RTC laban kay Trillanes kaugnay ng nasabing kaso.