Admin case vs 5 pulis sa rubout sinimulan na

KINOMPIRMA ng pambansang pulisya na sinisimulan na ng PNP-Internal Affairs Service (IAS) ang pagdinig sa kaso ng limang pulis na sangkot sa pagpatay sa isang tricycle driver sa bahagi ng Sampaloc, Manila.

Ayon kay PNP-PIO chief, Police Chief Supt. Wilben Mayor, sinisimulan na ng IAS ang pag-imbestiga hinggil sa kaso ng limang pulis.

Bukod sa kasong administratibo, nahaharap din sa kasong kriminal sina Senior Inspector Rommel Salazar, hepe ng Gulod Police precinct; PO3 Ferdinand Galera; PO1 Ronald Depasina, PO1 Roel Landrito, at PO1 Jomar Nandoy.

Sinabi ni Mayor, kanilang titiyakin na mananagot ang nasabing mga pulis kapag napatunayang nagkasala sila.

Pahayag ni Mayor, kabilang sa prayoridad ng PNP chief na manumbalik ang tiwala ng komunidad sa mga pulis.

Samantala, una nang tiniyak ni PNP chief, Police Director General Ricardo Marquez, nakangingitngit na marinig na may mga pulis na tiwali kaya’t sinigurado niya na may kalalagyan ang mga pulis na lumilihis ng landas.