HATAW! D'yaryo ng Bayan hatawtabloid.com
PATAY ang isang pulis gayondin ang isang lalaki na inaresto sa paglalaro ng cara y cruz, habang sugatan ang isa pang pulis nang pumalag sa aresto ang mga suspek kahapon ng madaling-araw sa Las Piñas City.
Binawian ng buhay habang ginagamot sa Las Piñas Doctors Hospital ang biktimang si PO2 Marlon Castillo, nakatalaga sa Police Community Precinct (PCP-4) ng Las Piñas City Police, at naninirahan sa 4 Seging St., Brgy. CAA ng nasabing lungsod, sanhi ng dalawang tama ng saksak sa dibdib.
Patay rin ang suspek na si alyas Toto makaraan barilin ni PO1 Carlie Balan, ginagamot sa nabanggit na ospital dahil sa saksak sa katawan.
Nakakulong na sa Las Piñas City Police detention cell ang isa pang suspek na si Felino Cruz, 48, construction worker, naninirahan sa 1043 Avocado St., ng nasabing lungsod.
Base sa isinumiteng report kay Senior Supt. Adolfo Samala Jr., hepe ng Las Piñas City Police, naganap ang insidente dakong 12:13 a.m. sa Aratelis St., Brgy. CAA ng naturang lungsod.
Ayon kay SPO1 Alvin P. Salasar, nang aarestohin ng mga pulis ang mga suspek, bumunot ng patalim si alyas Toto at inundayan ng saksak si PO2 Castillo.
Binaril at napatay si Toto ni PO1 Balan na nasaksak din sa insidente, habang naaresto si Cruz.
Jaja Garcia
