Budol-budol arestado

ARESTADO ng mga elemento ng Manila Police District-Police Station 2 ang isang miyembro ng budol-budol gang makaraang habulin ng kanyang biktima, kamakalawa ng gabi sa Tondo, Maynila.

Nakapiit na sa MPD-PS 2 ang suspek na si Dennis Perdagorta, 34, ng B-6, San Jose, Navotas City, nadakip sa panulukan ng Dagupan at Moriones streets, Tondo, Maynila dakong 7:45 p.m. kamakalawa.

Ayon sa reklamo ng biktimang si Fressie Evangelista, 28, ng Pavia St., Tondo, nilapitan siya ng suspek at nagtanong kung may alam na pinauupahang truck.

Sinabi ng suspek sa biktima na malaki ang kanilang kikitain sa sandaling maisara ang transaksiyon.

Nang mapansin ng suspek na nakuha ang tiwala ay inutangan ang biktima ng halagang P1,800 at ipinalit ang isang bungkos na pera na nakalagay sa sobre at pagkatapos ay umalis na.

Gayonman, hindi mapakali ang biktima kaya binuksan ang sobre at nakita ang ginupit-gupit na diyaryo kaya agad hinabol ang suspek.

Nagkataon na may mga nagpapatrolyang pulis at nakita na hinahabol ng biktima ang isang lalaki kaya nakihabol na rin hanggang maaresto ang suspek.

Gayonman, hindi na narekober sa suspek ang P1,800 na kinuha sa biktima.

Leonard Basilio