Bautista bagong Comelec chairman

ISANG taon bago idaos ang 2016 presidential elections ay itinalaga ni Pangulong Benigno Aquino III kahapon ang mga bagong opisyal ng Commission on Elections (Comelec).

Ayon kay Deputy Presidential Spokesperson Abigail Valte, hinirang ng Pangulo si Presidential Commission on Good Government (PCGG) Chairman Andres Bautista bilang bagong Comelec chairman, kapalit nang nagretirong si Sixto Brillantes noong nakalipas na Pebrero.

Habang sina attorneys Rowena Amelia Guanzon at Sheriff M. Abas ay ang mga bagong Comelec commissioner na kapalit ng mga nagretirong sina Lucenito Tagle at Elias Yusoph.

Magtatapos ang termino nina Bautista, Guanzon at Abas sa Comelec sa Pebrero 22, 2022 o tatlong buwan bago ang 2022 presidential elections.

Mananatiling bakante ang puwestong iniwan ni Bautista sa PCGG habang walang itinatalagang kapalit si Pangulong Aquino at wala pang pahayag ang Palasyo kung matutuloy ang balak na pagbuwag sa komisyon.

Siya ay naging dean ng College of Law ng Far Eastern University (FEU) at naging miyembro ng Constitutional Reform Commissions ng mga nakalipas na administrasyon.

Si Guanzon ay itinuturing na expert sa mga batas sa Violence Against Women bunsod nang paglilingkod niya bilang consultant on women’s rights sa Senado at kasama rin siya sa mga sumulat sa Anti-Violence Against Women and their Children Act of 2005 at Anti-Trafficking in Persons Act of 2003.   

Si Abas ay mula sa Cotabato City at naging abogado noong 2005.

Rose Novenario