Kaanak ng suspek sa Ateneo shooting itinumba
PINASLANG ang isa pang kaanak ng suspek sa pamamaril sa Ateneo de Manila University na si Dr. Chao Tiao-Yumol, nitong Sabado, 6 Agosto sa lungsod ng Lamitan, lalawigan ng Basilan.
Sa ulat ng pulisya, kinilala ang biktimang si Bhis Isniyan Yumol Asdali, 52 anyos, isang rubber tapper at tiyuhin ni Yumol.
Ayon sa Lamitan CPS, nakaupo si Asdali sa terasa ng kanyang bahay sa Sitio Muhibal, Brgy. Colonia, sa lungsod, dakong 9:30 pm nang dumating ang isang hindi kilalang lalaki at ilang ulit siyang pinagbabaril.
Agad binawian ng buhay si Asdali dahil sa rami ng tama ng bala ng baril sa kanyang katawan.
Narekober ng mga awtoridad ang anim na pumutok na cartridge at isang clip ng Garand rifle sa pinangyarihan ng krimen.
Nagsasagawa ang pulisya ng hot pursuit operations upang madakip ang suspek.
Si Asdali ang ikalawang miyembro ng pamilya Yumol na napaslang sa loob ng dalawang linggo matapos maaresto si Dr. Yumol na suspek sa pagpatay kay dating Lamitan Mayor Rose Furigay at dalawang iba pa sa loob ng Ateneo de Manila University sa lungsod ng Quezon noong 24 Hulyo.
Matatandaan, noong 29 Hulyo, pinatay ang ama ni Yumol na si Rolando malapit sa kanyang bahay sa lungsod ng Lamitan.
