HATAW! D'yaryo ng Bayan hatawtabloid.com
Isumbong mo
kay DRAGON LADY
ni Amor Virata
MARAMI na ang nabiktima ng mga scammer sa online apps na ginagamit ng mga illegal recruiter.
Pinangakuang maganda ang suweldo, at para mas kapani-paniwala ay padadalhan ng mga pekeng kontrata na kailangang i-fill-up ng aplikante, at pagkatapos ay hihingan ng placement fees.
Naku! ‘Wag na ‘wag subukan! Magugulat ka na lang hindi mo na makikita ang apps sa social media pagkatapos mong magpadala ng pera.
Lahat ay ginagawa ngayon ng mga scammers, kaya kung tatanga-tanga ka, isa ka sa mabibiktima.
Mag-inquire muna sa Philippine Overseas Employment Administration (POEA) kung rehistrado ang kompanyang inaaplayan. Kung hindi mo gagawin, ilista mo na lang sa tubig ang iyong karanasan.
KUNG KAILAN MATATAPOS ANG PANDEMYANG COVID, WALANG NAKAAALAM
MULING nagdeklara ng state of calamity si Pangulong Rodrigo Duterte hanggang Setyembre 2022.
Ibig sabihin nito, isang taon pa ang palugit para tuluyang bumalik ang normal na sitwasyon sa ating bansa,
Sabi ng nakararami, hangga’t masikip ang mundo dahil sa rami ng mga tao, hindi agad aalis ang CoVid. Kaya naman dapat magpabakuna ang lahat. Doon sa mga ‘di naniniwala sa bakuna, I’ll pray for you.
Dapat alisin sa isipan ang konsepto na dahil bakunado na ay ‘di na tatablan ng CoVid, mali!
Dapat pa rin mag-ingat dahil ang hindi pagsunod sa health protocols kahit bakunado na ay puwede pa rin maging biktima ng CoVid, dahil mistula itong si Goliath na mabagsik.
Kaya kapag nagpabaya ay posibleng umatake ang CoVid sa iyong kalusugan. Saan ka, sumunod sa health and safety protocols o kay kamatayan? Kung gusto mo pang mabuhay wala kang gagawin kundi mag-ingat!
