Ivana, namigay ng food packs mula sa kinita ng kanyang sexy vlog

MASASABING mala-Angel Locsin ang baguhang si Ivana Alawi sa ginawa n’yang paghahanda ng daan-daang food packs gamit ang sarili n’yang pera. 

Nag-post siya kamakailan sa Facebook at Instagram ng dalawang litrato n’ya, kasama ang ina at isang kapatid na babae, na napaliligiran ng mga isinupot nilang edible goods na ipamimigay sa mga kababayan nating ‘di nakapaghahanapbuhay dahil sa enhanced community quarantine. 

“Pasensya na kayo sa hitsura namin. Madaling araw na kami natapos mag-pack ng mga pagkain na ipamimigay namin sa mga kababayang nangangailangan ng tulong. I am encouraging everybody to help. Maliit man yan o malaki, ang importante ay tumulong tayo,” sabi ni Ivana sa Facebook n’ya (@ivanaalawi).

Sa mga litrato, may nakapaligid din sa kanila na mga sako-sakong bigas, kahon-kahong mga delata, kape, noodles, at kung ano-ano pa. Mukhang ‘di pa talaga tapos sa pagsusupot. 

Gaya nang naging trademark na n’ya tuwing nagpapalitrato siya para sa social media, labas ang itaas na bahagi ng malusog n’yang dibdib. Mismong ang butihin n’yang ina at kapatid ay sanay na sa ganoong hitsura n’ya. 

Samantala, may mga nagsasabing ang ipinambili ni Ivana ng goods na ipamamahagi n’ya ay mula sa kinita n’ya bilang isang sexy vlogger sa You Tube. 

Hindi n’ya binanggit sa post n’ya sa Facebook at Instagram kung kasama siya sa pagdi-disribute ng food packs, pati na kung saan-saan ipamamahagi ang mga iyon, at kailan. 

Malamang na magpasama siya sa mga pulis o sa Army kung kasama siya mismo sa pamamahagi ng food packs. 

Kung ngayon pa lang na malamang na ‘di pa kalakihan ang kita n’ya ay may puso na siya sa pagkakawang-gawa, may mga nagsasabing magiging mala-Angel nga si Ivana na ‘di-mangingiming gamitin ang sarili n’yang pera sa pagtulong sa maraming taong nangangailangan. 

KITANG-KITA KO
ni Danny Vibas