SUGATAN ang tatlong construction worker matapos ang insidente ng pagsabog sa loob ng isang warehouse ng gasolina sa Vitas, Tondo, lungsod ng Maynila nitong Sabado ng umaga, 21 Hunyo.
Naganap ang insidente dakong 9:00 ng umaga habang may inaayos ang mga construction worker sa loob ng warehouse.
Batay sa mga paunang ulat, may natamaang crude oil pipeline ang mga trabahador na naging dahilan ng pagsabog.
Isinugod ang mga biktimang may edad 24, 25, at 30 anyos sa Tondo Medical Center upang lapatan ng lunas ang mga lapnos at pasong kanilang inabot.
Patuloy ang malalim na pagsisiyasat na isinasagawa ng mga fire investigator upang matukoy ang dahilan ng pagsabog at kung nasunod ang kaukulang proper safety protocols sa konstruksiyon.
Ayon sa mga residente sa lugar, nakarinig sila ng malakas na pagsabog kasunod ang malaking usok na nagmula sa pasilidad.
Samantala, walang naiulat na nadamay na mga estruktura malapit sa warehouse.
