HATAW! D'yaryo ng Bayan hatawtabloid.com
NAKOPO ni Shamcey Supsup-Lee, independenteng kandidato para sa konseho ng Lungsod ng Pasig, ang ika-apat na puwesto mula sa 15 kandidato sa unang distrito ng lungsod, batay sa survey ng PasigPH na isinagawa sa mga rehistradong botante.
Isinagawa ng PasigPH chapter ng Phil TechDev Transparency Survey, na may SWS trust survey approval, ang kanilang research at interbyu mula noong 1-31 Marso ng kasalukuyang taon.
Sa pananaw ng tagasuri, lalong titingkad ang kandidatura ni Shamcey Lee nang manindigan at kumalas ito sa lokal na partido na KAYA THIS makaraang magbitaw ng misogynistic remark si Ian Sia, lone congressional candidate ng lungsod, noong 28 Marso.
Ayon kay Shamcey-Lee, pinili kong manindigan nang matatag sa mga pagpapahalagang pinanghawakan ko sa buong buhay ko – dignidad, respeto, pananagutan, at pagpapaangat sa kababaihan.
“Sa puntong ito, naniniwala akong ang pinakamainam na paraan upang manatiling tapat sa mga prinsipyong ito ay ang isang hakbang na pag-atras, magnilay, at makinig upang bigyang-daan ang kaliwanagan bago gawin ang susunod na mga hakbang,” saad pa ni Lee.
Sinabi ni Shamcey Lee, sa pagpapatuloy ng kanyang kandidatura at kampanya sa susunod na araw ay walang balakid na hahadlang sa kanyang paninindigan na puspusang ipaglaban ang pangunahing interes ng batayang sektor lalo na ang kapakanan ng mga kababaihan.
Tinatayang 15 milyon ang bilang ng solo parents sa Filipinas, na 95% ay kababaihan, ayon sa World Health Organization (WHO).
Patuloy na dumaranas ng suliraning pang-ekonomiya ang mga solo parent, karamihan sa kanila ay nahihirapan pagsabay-sabayin ang trabaho, pagpapalaki ng anak, at mga gawaing bahay, saad ni Shamcey Lee.
Mababatid na si Shamcey Supsup-Lee ay may karanasan sa pangangasiwa ng Miss Universe Philippines Organization.
“Ang adbokasiya ko sa women empowerment ay ipaninindigan ko sa buong buhay,” saad ni Lee.
Ipinaalala ni Lee, ang mga mahahalal na mambabatas sa lokal at nasyonal ay tungkulin na isagawa nito na paglingkuran ang sambayanan.
Si Shamcey Supsup Lee ay naging salutatorian sa elmentarya at high school sa pampublikong paaralan.
Isang beauty pageant title holder si Shamcey Gurrea Supsup-Lee nang koronahan siya bilang Binibining Pilipinas Universe 2011.
Naging representante siya sa Miss Universe 2011 pageant na ginanap sa Brazil at nasungkit niya ang pagiging 3rd Runner-Up.
Nagtapos si Shamcey ng kursong Arkitektura sa University of the Philippines. Tumanggap siya ng akademikong karangalan bilang Magna Cum Laude.
Nakamit ni Shamcey Lee ang pagiging board topnotcher sa ginanap na Architecture Licensure Exam noong 2010.
