Janitor pinagsasaksak ng helper

KRITIKAL ang kalagayan sa pagamutan ng isang janitor matapos pagsasaksakin ng kanyang kapitbahay sa Malabon City, kamakalawa ng gabi.

Ginagamot sa Tondo Medical Center  (TMC) ang biktimang kinilalang  si Gomer Damot, 32 anyos, residente sa Espiritu St., Brgy. Tinajeros sanhi ng mga saksak sa katawan.

Patuloy na pinaghahanap  ang suspek na kinilalang si Jay-ar Ladia, 26 anyos, kapitbahay ng biktima sa nasabing lugar.

Sa tinanggap na ulat ni Malabon police chief, Col. Albert Barot, dakong 9:00 pm, kainuman ng biktima ang kanyang tiyuhin sa  kanyang bahay at nang makaubos ng ilang bote ng alak ay lumabas si Damot upang bumili ngunit nakita niya ang suspek na umiinom din kasama ang kaibigan nito.

Tinanong ng suspek ang biktima “Ano ang problema mo?” na sinagot niya ng “Kung sasabihin ko ba sa iyo masosolusyonan mo?” na ikinagalit ni Ladia ngunit inawat siya ng kanyang mga kaanak.

Gayonman, nang paalis na ang biktima matapos ang negosasyon ay naglabas ng patalim ang suspek at inundayan ng ilang saksak sa katawan ang biktima bago mabilis na tumakas sa hindi matukoy na direksiyon habang isinugod si Damot ng nagrespondeng mga pulis sa naturang pagamutan. (ROMMEL SALES)