HINIKAYAT ng PNP Anti-Illegal Drugs Special Operations Task Force ang bus operators na isailalim sa screening ang mga nag-aaplay na driver bago tanggapin sa kanilang kompanya.
Ito’y kasunod ng pagkakahuli kamakalawa sa isang dating sekyu na nagsisilbing supplier ng shabu sa mga bus driver at konduktor sa South terminal sa Alabang.
Naaresto ng PNP-AIDSOTF ang nasabing pusher na kinilalang si Emmanuel Bendoval alyas Bagwis.
Ayon kay PNP AIDSOTF legal chief, C/Insp. Roque Merdegia, walang masama kung isama sa kanilang requirements ang magpa-drug test ang kanilang aplikante lalo na ngayong tinanggal na ng LTO ang drug testing requirement sa pagkuha ng lisensiya.
Giit ni Merdegia, mas mabu-ting isailalim sa drug test ang lahat ng bus driver ng isang bus company kada anim na buwan.
Ito ay dahil lumabas sa inis-yal na imbestigasyon ng pulisya na maraming mga driver at konduktor ng nasabing bus terminal ang suki ng suspek na si Bagwis.
Samantala, hinala ni PNP AIDSOTF Chief, S/Supt. Bartolome Tobias, baka napasok na rin ni Bendoval ang iba pang terminal sa ibang lugar sa Metro Manila para bentahan ng illegal na droga ang mga driver at konduktor. (HNT)
