2 dalagita nasagip sa human trafficking

NASAGIP ng mga tauhan ng Manila Police District (MPD) ang dalawang dalagita sa loob ng hotel makaraan mabiktima ng human trafficking sa Maynila.

Kasong human trafficking (Republic Act 9208) ang isinampa sa Manila Prosecutor’s Office laban sa suspek na si Jasmin Alfabeto alyas Candy Angeles, 21-anyos, residente ng P. Santos St., Pasay City.

Sa ulat ni Manila Police District-District Legal Office chief, Supt. Dennis Wagas, nasagip ang mga biktima na itinago sa pangalang Jennifer at Mary Ann, kapwa 17-anyos, pawang taga-Cavite.

Una rito, humingi ng tulong ang Inter-Agency Council Against Trafficking (IACAT) ng Department of  Justice (DoJ) sa tanggapan ni Supt. Wagas, kasama ang ilang tauhan ng Women’s and Children’s Protection Section, kaugnay sa isasagawang entrapment operation laban sa suspek na napag-alamang  nasa likod ng prostitusyon at sexual exploitation sa mga kabataan.

Mismong ang suspek ang nakikipagkita para sa kabayaran ng mga alaga niyang babae na idini-deliver niya sa kanyang mga kliyente.

Lingid sa kanyang kaalaman, nagpanggap na kostumer ang dalawang awtoridad na naghihintay sa Las Palmas Hotel, sa Ermita, Maynila.

Dakong 3:30 p.m. nang ihatid ng suspek sa Room 504 ang dalawang dalagita at makaraan magkabayaran ay agad dinakip si Alfabeto.

Dinala na ang dalawang dalagita sa kustodiya ng DWSD.

Leonard Basilio/Angelica Ballesteros