Tulak tigbak sa parak (Bigtime drug dealer nakatakas)

PATAY na bumulagta ang isang notoryus na drug pusher makaraan makipagbarilan sa mga awtoridad habang nasakote ang kasabwat niyang babae sa police operation sa Brgy. Minuyan 1, San Jose Del Monte City, Bulacan kamakalawa ng madaling araw.

Kinilala ang napatay na si Sam “Pogi” Pangandaman, 24, habang ang naarestong kasabwat ay kinilalang isang Arlene Absalon, 22, parehong nakatira sa Block 29, Road 2 sa nabanggit na barangay.

Sa ulat mula kay Supt. Charlie Cabradilla, hepe ng SJDM City police, sinalakay ng Lambat/Sibat Trackers Team ang Mayer’s Apartment makaraan makatanggap ng impormasyon na nagtatago roon ang wanted na si Amir “Tangkad” Manda, may warrant of arrest sa kasong double murder.

Si Pangandaman ay tauhan ni Manda na siyang pangunahing suspek sa pamamaril at pagpatay sa dalawang pulis na sina PO2 Arsil Nasir at PO1 Freddie Claro noong Oktubre 2014.

Papasok pa lamang ang tropa ng pulisya sa nabanggit na lugar nang magkabakbakan hanggang mapatay si Pangandaman habang nakatakas ang wanted na si Manda.

Micka Bautista