Pacman fan naglaslas ng tiyan (Nadesmaya sa talo)

TACLOBAN CITY – Isang boxing fanatic ang naglaslas sa kanyang tiyan nang madesmaya sa naging resulta ng Mayweather-Pacquiao fight.

Kinilala ang biktimang si Pablo Pabilona, Jr., 30-anyos, at residente ng Brgy. Bagsa, Paranas, Samar.

Ayon sa pamilya ng biktima, umaga pa lamang kamakalawa ay nakipag-inoman na si Pabilona sa kanyang mga kapitbahay at nang malamang talo si Pacquiao ay biglang nagbago ang mood.

Hanggang sumapit ang 8 p.m. umuwi ang biktima ngunit pagkaraan ay natagpuang may laslas na ang tiyan at lumabas na ang kanyang lamang-loob.

Agad siyang dinala sa Eastern Visayas Regional Medical Center.

Ayon sa kaibigang nagdala sa ospital, desperado ang biktima dahil natalo ang kanyang idolo kaya nilaslas ang sariling tiyan.

Kritikal ang kalagayan ng biktima at patuloy na inoobserbahan ng mga doktor.

Obrero tinarakan ng kapustahan (Sa Pac-May fight)

SUGATAN ang isang obrero makaraan saksakin ng kanyang kapustahan sa labanang Pacquiao-Mayweather nang hindi magkabayaran kamakalawa ng gabi sa Navotas City.

Patuloy na ginagamot sa Tondo General Hospital ang biktimang kinilalang si Vergel Varela, 31, ng Barron St., Brgy. North Bay Boulevard ng nasabing lungsod.

Habang pinaghahanap ang suspek na si Don-Don Dalingay, 36, ng R-10, ng nasabing barangay, mabilis na tumakas makaraan ang insidente.

Batay sa ulat nina PO3 Allan Joey Ogatia III, PO2 Allan Bangayan, at PO2 Exequiel Sangco, dakong 9:20 p.m. nang maganap ang insidente sa tapat ng bahay ng biktima sa nasabing lugar.

Dumating ang suspek sa lugar at sinisingil ang perang napanalunan sa pakikipagpustahan sa laban nina Pacquiao at Mayweather ngunit walang maibigay ang biktima dahilan upang sila ay magkasagutan.

Hanggang bumunot ng patalim ang suspek at inundayan ng saksak sa dibdib ang biktima.

Rommel Sales