Kelot nagbaril sa ulo

PATAY ang isang 22-anyos lalaki makaraan magbaril sa ulo sa kanilang bahay sa Pandacan, Maynila kahapon.

Hindi na umabot nang buhay sa Sta. Ana Hospital ang biktimang si Jordado Tito, may live-in partner, walang trabaho, residente ng 1939 Masigasig Street, Pandacan, Maynila.

Ayon sa imbestigasyon ni SPO1 Charles John Duran ng Manila Police District Homicide Section, dakong 4:10 a.m. nang maganap ang insidente sa loob ng bahay ng biktima.

Nabatid na kasama ng biktima ang kanyang live-in partner na si Jaysell Sagum at mga kaibigan na sina Genieva Ruis at Cristene Grace Mesias nang magkayayaang sila ay mag-inoman.

Ngunit habang nag-iinoman, ipinakita ng biktima ang kanyang pen gun kaya pinagsabihan ni Sagum na itabi ito.

Dakong 3:45 a.m. nagpasyang umuwi na ang mga bisita habang nagpaalam si Sagum na magsisipilyo sa banyo bago matulog. Ngunit habang siya ay nasa banyo nang makarinig siya ng putok ng baril.

Mabilis siyang lumabas at nakitang nakabulagta at duguan ang biktima na nagbaril sa ulo.

Mabilis na isinugod sa pagamutan ang biktima ngunit hindi na umabot nang buhay.

LEONARD BASILIO, may dagdag na ulat sina MARY JOY SAWA-AN, DARWIN MACALLA at JOSHUA MOYA