Magkalaguyo ipinakulong ng biyenan (Naaktohang nagtatalik)

GENERAL SANTOS CITY – Inaresto ng pulisya sa Malapatan Sarangani province ang isang babae at kalaguyo makaraan ireklamo ng biyenan nang maaktohan ang pagtatalik ng dalawa sa loob mismo ng pamamahay ng kanyang anak.

Pursigido si Renato Labid na kasuhan ng adultery ang kanyang manugang na si Glory Labid, 25, habang concubinage kay Ranie Basalan, 40, kapwa mga residente ng Lun Padidu, Malapatan, Sarangani.

Sinabi ng nakatatandang Labid, pumasok sa bahay ng kanyang anak ang suspek pasado 11 p.m. nitong Sabado at nakitang hubo’t hubat ang dalawa habang nagtatalik kaya’t tinawag ang isa pa niyang manugang para makita ang kalaswaang ginagawa ng dalawa.

Nabatid na apat na araw pa lamang pumalaot ang mister ni Glory habang ang misis ni Ranie ay nagtatrabaho sa Maynila.

Itinanggi ni Glory ang paratang at sinabing nagsangla lamang ng cellphone si Ranie at hindi totoong wala silang mga saplot sa katawan dahil nag-uusap lamang sa sala ng bahay.