Truck swak sa bangin 5 patay, 30 sugatan

CAUAYAN CITY, Isabela – Umakyat na sa lima ang patay habang 30 ang sugatan sa pagkahulog ng isang forward truck sa tabi ng ilog sa Nagtipunan, Quirino kamakalawa.

Ang truck ay galing sa Osmeña, Cordon, Isabela at patungo sana sa Dinadiawan, Aurora Province para sa outing ng pamilya ng balikbayan na nurse mula sa Egypt na si Norilyn Rapada-Calahi na namatay sa ospital.

Ang apat iba pa na agad binawian ng buhay ay sina Juanita Rapada, Nida Orio, isang alyas Nonong at Kimberly Supnet.

Sinabi ni Sr. Inspector Victoriano Yarcia, hepe ng Nagtipunan Police Station, galing sa mataas na bahagi ng daan ang truck at nang pababa na ay nawalan ng preno ang driver kaya bago marating ang tulay ay natumba, gumulong at nahulog sa tabi ng ilog.

Nagtulungan ang iba’t ibang rescue team sa pangunguna ng mga pulis sa bayan ng Nagtipunan sa pag-rescue sa mga biktima.

Unang dinala ang mga nasugatan sa Maddela District Hospital sa Maddela, Quirino ngunit inilipat sila sa Quirino Medical Center sa Cabarroguis, Quirino.