Magpinsang nasunugan kritikal sa kuyog

DOBLENG dagok para sa mga kaanak ang nangyari sa magpinsang binatilyo na makaraan masunugan ay kinuyog ng isang grupo ng mga kabataan nang mapagkamalan silang mga kalaban kamakalawa ng gabi sa Navotas City.

Naa malubhang kalagayan sa Jose Reyes Memorial Medical Center ang mga biktimang sina Redentor Manliclic, 19; sanhi ng palo ng dos por dos sa ulo, at Jerome Castillo, 17, maraming saksak sa katawan, kapwa residente ng Block 2, Kadima St., Letre Road, Brgy. Tonsuya, Malabon City, at hindi pa nakarerekober ang pamilya makaraan masunugan kamakailan.

Habang naglunsad ng manhunt operation ang mga awtoridad laban sa grupo ng mga kabataan na mabilis na tumakas makaraan ang insidente.

Batay sa ulat nina PO2 Jennalyn Manabat at PO2 Exequiel Sangco, dakong 10 p.m. nang maganap ang insidente sa C-4 Road, Brgy. Bagong Bayan North ng nasabing lungsod.

Tinatahak ng magpinsan ang nasabing lugar habang magkaangkas sa bisekleta nang harangin sila ng mga suspek at pinagtulungang bugbugin.

Nabatid na bago ang insidente, dalawang grupo ng kabataan ang nagkainitan sa nasabing lugar hanggang mapaghiwalay ng mga barangay tanod ngunit bumalik ang mga suspek at minalas na ang magpinsan ang napagkamalang mga kalaban.

Rommel Sales