VIP security officer dedo sa kabaro

PATAY ang isang VIP security officer makaraan barilin ng kanyang kasamahan na sinita dahil hindi sumasagot habang tinatawagan sa radyo kahapon ng madaling araw sa Pasay City.

Namatay habang nilalapatan ng lunas sa Manila Adventist Hospital ang biktimang si Nicky Albert Arevalo, 34, ng Block 54, Lot 22, F2, Dagat-Dagatan, Caloocan City, sanhi ng ilang tama ng bala sa kaliwang dibdib, kanang katawan at kaliwang hita mula sa hindi pa batid na kalibre ng baril.

Pinaghahanap ng pulisya ang suspek na si Rolly Algarme, nasa hustong gulang, may asawa, isa ring VIP security officer, nakatira sa ARESCOM, Fort Bonifacio, Taguig City.

Sa report na natanggap ni Pasay City Police Officer-In-Charge (OIC), Sr/Supt. Sidney Hernia, naganap ang insidente dakong 1:15 a.m. sa loob ng isang pribadong parking lot sa Leveriza St., ng naturang lungsod.

Bago ang pamamaril, tinatawagan ng biktima ang suspek sa handheld radio, ngunit hindi sumasagot.

Dahil sa hindi pagsagot ni Algarme sa radyo, nainis ang biktima hanggang nagkaroon nang mainitang pagtatalo ang dalawa.

Sa kainitan ng pagtatalo, binunot ng suspek ang kanyang service fire arm at tatlong ulit pinaputukan ang biktima.

Duguang bumulagta ang biktima na dali-daling dinala ng kanyang mga kasamahan sa ospital ngunit habang nilalapatan ng lunas ay namatay.

Ang suspek ay mabilis na tumakas makaraan ang pamamaril.

Nasaksihan ang insidente ng kasamahan din nilang VIP security officer na sina Melquides Quides at Jhun Bonillo.

Patuloy na iniimbestigahan ng pulisya ang naturang insidente.

Manny Alcala