Walang Pinoy sa bumagsak na German plane sa France — DFA

WALANG Pilipino sa 150 pasahero at crew na pinangangambahang namatay sa pagbagsak ng German plane sa France.

Ayon kay Foreign Affairs Spokesperson Charles Jose, batay sa kanilang pakikipag-ugnayan sa embahada ng Filipinas sa Paris, walang Filipino sa listahan ng mga pasahero ng Lufthansa Germanwings flight 4U 9525.

Una nang naiulat na 144 pasahero at anim na crew ang sakay ng eroplano na biyaheng Barcelona, Spain-Duesseldorf, Germany.

Ayon sa Germanwings, 67 pasahero ay pawang Germans habang ayon sa deputy prime minister ng Spain, 45 ang pinaniniwalaang Spanish. May isang naitalang Belgian.

Kabilang din sa sinasabing sakay ng eroplano ang 16 estudyante at dalawang guro mula sa Joseph-Koenig-Gymnasium High School sa Germany. 

Sa pinakahuling impormasyon, narekober na ang black box ng eroplano.