Tag-init idedeklara ngayong linggo –PAGASA

POSIBLENG ngayong papasok na linggo na ideklara ng PAGASA ang pagpasok ng panahon ng tag-init.

“Malapit na po at hopefully this week ay madeklara natin o ma-announce natin na tag-init na,” pahayag ni PAGASA weather forecaster Aldczar Aurelio.

Palatandaan na aniya rito ang maalinsangang panahon na nararanasan sa bansa.

“Dapat sana e kalagitnaan ng Marso ‘yung pinaka-late na umpisa ng tag-init e hindi po nangyari e malapit na pong matapos ang Marso. Hopefully ngayong linggo (maideklara na ang summer).”

Ang inaasahang temperatura sa Metro Manila ay posibleng umabot sa 34-35 degrees Celsius habang sa Cabanatuan at Tuguegarao — na kadalasang nagtatala ng highest temperature — ay posibleng pumalo sa 38 degrees Celsius.