Chinese trader utas sa kagitgitan

PATAY ang isang negosyanteng Tsinoy nang pagbabarilin ng isang lalaking nakaalitan makaraan makagitgitan sa kalsada sa Valenzuela City kamakalawa ng gabi.

Agad binawian ng buhay ang biktimang si Edwin Tan, 45, residente ng #7 Mica St., Jordan Plane, Novaliches, Quezon City sanhi ng tatlong tama ng bala ng hindi pa mabatid na kalibre ng baril sa katawan.

Patuloy na pinaghahanap ng mga tauhan ni Senior Supt. Rhoderick Armamento, hepe ng Valenzuela Police, ang suspek na kinilala sa naiwang I.D. sa kanyang sasakyan na Toyota Hi-Lux (UQN-816), na si Rommel Rin, residente ng La Iñigo St., Brgy. Ugong, ng nasabing lungsod.

Ayon sa ulat ng pulisya, dakong 9 p.m. nang maganap ang insidente sa Mindanao Avenue ng nasabing barangay.

Sakay ang biktima ng kanyang Toyota Innova (NWI-253) nang makagitgitan ang Toyota Hi-Lux na dala ng suspek.

Agad bumaba ng sasakyan ang suspek at kinompronta ang biktima habang nakamasid lang ang mga kasama.

Humantong ito sa mainitang pagtatalo hanggang  bumunot ng baril ang suspek at tatlong beses na pinaputukan ang biktima.

Makaraan ang insidente, iniwan na lamang ng suspek ang kanyang sasakyan at mabilis na tumakas sa hindi matukoy na direksyon bitbit ang ginamit na baril.

Rommel Sales