Buntis na baka ginahasa ng adik

ARESTADO ang isang lalaki makaraan maaktohan ng mga barangay tanod habang hinahalay ang isang buntis na baka sa Brgy. Biga Dos, Silang, Cavite.

Nakakulong na si Andy Loyola, 46, kinasuhan ng paglabag sa Republic Act 8485 o Animal Welfare Act.

Kuwento ng may-ari ng baka na si Rustico Carlo, nitong Martes ng umaga, itinali niya ang kanyang alaga sa bukid at iniwan nang ilang oras ngunit nang balikan ay wala na ito.

Agad niyang ipinagbigay-alam sa barangay ang pagkawala ng alaga kaya hinanap nila ito at naaktohan ang suspek na hinahalay ang kanyang baka.

Nakompiska ang ilang piraso ng drug paraphernalia mula sa suspek na hinihinalang nasa ilalim ng impluwensya ng droga.

Nabatid na hindi ito ang unang pagkakataon na nanghalay ng hayop ang suspek.

Napag-alaman ding buntis ang hinalay na baka.

Iniimbestigahan na ang insidente habang posibleng isalang sa medical examination ang suspek at ang hinalay na baka.