HATAW! D'yaryo ng Bayan hatawtabloid.com
ISANG manhunt operations ang inilunsad ng Quezon City Police District (QCPD) laban sa dalawang miyembro ng ‘termite gang’ na pumasok sa isang pawnshop at tumangay ng P3.7 milyon halaga ng mga alahas at pera nitong Martes, 13 Mayo.
Sa imbestigasyon ng pulisya, nabatid na humukay ang mga suspek ng daan patungo sa EJM Pawnshop sa panulukan ng Quirino Highway at Susana St., sa Brgy. Gulod ng nabanggit na lungsod.
Nadiskubre ng isa sa mga empleyado ng naturang pawnshop ang pagsalakay ng ‘termite gang’ dakong 4:00 ng madaling araw.
Agad iniulat sa Novaliches Police Station at sinuri ang CCTV footage kaya nakitang lumabas sa isang butas sa loob ng pawnshop ang mga suspek.
Bukod sa sinira ng mga suspek ang alarm ng pawnshop puwersahang binuksan ang vault sa pamamagitan ng acetylene torch.
Natangay ng mga suspek ang mga alahas na nagkakahalaga ng P3.5 milyon at P200,000 cash.
Ayon sa pulisya, maaaring ginamit na daan ng mga suspek ang manhole malapit sa naturang pawnshop.
