SUGATAN ang isang empleyado sa sunog na tumupok sa La Consolacion College, sa Mendiola St., lungsod ng Maynila, nitong Miyerkoles, 13 Nobyembre.
Kinilala ng Bureau of Fire Protection (BFP) ang empleyado ng paaralan na si Ray Ruiz, 32 anyos, nagalusan sa kaniyang kanang braso.
Ayon sa mga awtoridad, nadulas ang biktima habang bumababa ng hagdan upang hindi ma-suffocate sa usok na nagmumula sa nasusunog na silid.
Sa paunang ulat, nagsimula ang sunog dakong 9:30 am sa pangalawang palapag ng solar building ng paaralan at tuluyang naapula dakong 9:54 ng umaga.
Tinatayang umabot sa P144,000 ang halaga ng pinsalang dulot ng insidente na hanggang ngayon ay inaalam pa ang pinagmulan, ayon sa BFP.
