SA ITINAKDANG deliberasyon para sa P6.352 trilyong pambansang badyet, sinabi ng isang dating opisyal ng gobyerno na panahon na para i-highlight sa mga mambabatas na dagdagan ang pondo para sa pangkalahatang pag-unlad ng sports, para makabuo ng mas maraming gold-winning athletes.
Sinabi ni Atty. Nicasio Conti, dating commissioner ng Presidential Anti-Graft Commission (PACC), dating Maritime Industry Authority (MARINA) Officer-In-Charge at ngayon ay Chief Executive Officer (CEO) ng Capstone Intel Corp., na ipinakita ni two-time gold medalist Carlos Yulo na maaaring makipagsabayan ang Filipino sa lahat ng grandest sports spectacle kabilang ang Olympics.
“Binibigyang-diin ng tagumpay ni Carlos Yulo ang potensiyal ng ating mga atleta kapag nabigyan ng sapat na suporta at mapagkukuhaan. Upang magdala ng mas maraming ginto at kaluwalhatian sa ating bansa sa hinaharap, kinakailangang mamuhunan tayo nang higit sa mga programa sa pagpapaunlad ng palakasan, pasilidad, at pagsasanay. Palakasin lamang ang pagiging mapagkompetensiya ng ating mga atleta ngunit itaguyod din ang kultura ng kahusayan sa palakasan ng Filipinas,” wika ni Conti, sa paghimok sa pamahalaan na dagdagan ang pondo para sa pangkalahatang pagpapaunlad ng palakasan.
Pinuri ni Conti ang dedikasyon, pagsusumikap, at tiyaga ni Yulo, na nagbunga ng makasaysayang tagumpay para sa kanya at sa buong bansa.
“Muling pinatunayan ni Carlos Yulo na kayang makipagkompetensiya at maging mahusay sa entablado ng mundo ang mga atletang Filipino. Nagsisilbing inspirasyon ang kanyang mga nagawa sa lahat ng mga aspiring athletes sa Filipinas,” pahayag ni Conti.
Nananatiling nakatuon ang Capstone Intel Corp., sa pagsuporta sa mga inisyatiba na nagtataguyod ng paglago at pag-unlad ng sports sa Filipinas.
Naniniwala ang kompanya, sa pagtaas ng pondo at suporta ng gobyerno, makakamit ng mga atletang Filipino ang mas mataas at patuloy na magdadala ito ng karangalan sa bansa. (NIÑO ACLAN)
