NAMATAY ang isang babaeng rider na pinaniniwalaang sumadsad ang minamanehong motorsiklo sa Buendia Avenue flyover sa Makati City kahapon ng umaga.
Pansamantalang hindi ibinunyag ng Makati City Traffic Bureau ang pangalan ng biktima, tinatayang nasa edad 25 hanggang 26 anyos, dahil kailangan munang malaman ng pamilya ang sinapit ng babae.
Wala nang buhay ang biktima nang madatnan ng mga awtoridad.
Sa inisyal na imbestigasyon, dakong 6:00 am kahapon nang mangyari ang insidente sa Buendia flyover ng nasabing lungsod.
Minamaneho ng biktima ang kanyang motorsiklo na binabaybay ang kalsada patungo sa Bonifacio Global City (BGC).
Sa ulat, sinabing mabilis ang takbo ng motorsiklo, bago sumadsad sa naturang flyover ngunit dahil sa lakas ng impact ay tumilapon nang ilang metro ang layo at natanggal ang suot na helmet ng biktima na naging dahilan ng kanyang kamatayan.
Patuloy na iniimbestigahan ang nasabing insidente ng mga awtoridad. (NIÑO ACLAN)
