HATAW! D'yaryo ng Bayan hatawtabloid.com
SIMULA sa susunod na taon, 2022, pitong pribadong pagamutan sa lungsod ng Iloilo ang hindi na konektado sa Philippine Health Insurance Corporation (PhilHealth) dahil sa bigo nitong pagbabayad ng may kabuuang P545-milyong claims nang magsimula ang pandemyang dulot ng CoVid-19.
Kabilang sa mga ospital na kumalas sa PhilHealth ang St. Paul’s Hospital, Iloilo Doctors Hospital, Iloilo Mission Hospital, The Medical City Iloilo, Medicus Medical Center, Qualimed Hospital Iloilo, at Metro Iloilo Hospital and Medical Center na pormal nang ipinaalam sa pamamagitan ng liham sa alkalde ng lungsod na si Mayor Jerry Treñas.
“We are greatly saddened by this action we have to take. However, we are left with no other choice but to ensure the survival of our hospitals so that we can uphold our commitment to offer necessary and quality healthcare to our patients,” ang pahayag ng pamunuan ng pitong pagamutan.
Sa kabuuang P545 milyon, sinabi ng naturang mga pagamutan na tanging 20 porsiyento lamang ang nababayaran sa kanila ng PhilHealth at naipon na ang mga hindi pa naibibigay ng ahensiya simula Setyembre hanggang Nobyembre 2021.
Samantala, kahit pinutol ng pitong pagamutan ang kanilang koneksiyon sa PhilHealth, tiniyak nilang mapagsisilbihan pa rin umano nila ang mga miyembro ng PhilHealth.
“We would continue to serve PhilHealth members and provide statements of accounts for reimbursement and remit employee contributions, but will no longer automatically deduct and process claims,” pagpapaliwanag nila.
Nitong Setyembre, nagsampa ng reklamo ang pamahalaang lungsod ng Iloilo laban sa anim na opisyal ng PhilHealth dahil sa kabiguan nilang magbayad ng claims sa pitong pagamutan.
“I am asking the PhilHealth to find ways to settle the accountabilities with the private hospitals. Since early this year, I tried to mediate between the PhilHealth and the hospitals to no avail,” pahayag ni Treñas nitong Linggo, 12 Disyembre.
