PATAY agad ang isang magsasaka sa bayan ng Allacapan, lalawigan ng Cagayan, matapos saksakin ng nakababatang kapatid dahil sa pagbili ng biktima ng alak gamit ang ayuda mula sa lokal na pamahalaan, nitong Linggo, 28 Nobyembre.
Kinilala ni P/Maj. Antonio Palattao, hepe ng Allacapan MPS, ang biktimang si Ador Castro, 43 anyos, namatay nang saksakin sa dibdib ng kanyang 18-anyos kapatid, kinilala sa pangalang Jefferson, gamit ang isang kitchen knife.
Ayon sa imbestigasyon, nauna nang kinastigo ng kanilang ama si Ador dahil sa paggasta ng ayuda para sa alak imbes ibili ng pagkain para sa kanilang pamilya.
Nang akma umanong aatakehin ni Ador ang ama, pumagitna si Jefferson na nagresulta sa pagtatalo ng magkapatid.
Tinangka ni Ador na saksakin si Jefferson gamit ang isang itak ngunit nagawang saksakin ni Jefferson ang kanyang kuya na naging sanhi ng kanyang agarang kamatayan.
Pahayag ni Jefferson sa mga imbestigador, nagawa niya ito bilang pagtatanggol sa kanyang sarili at sa ama.
