Daniel, kahit pulot na kabibe ang iregalo, ikasisiya ni Kathryn

NAGKAKATAWANAN noong presscon ng Can’t Help Falling in Love nang aminin ni Daniel Padilla na ang totoo, wala pa siyang birthday gift para kay Kathryn Bernardo. Masasabi ngang late na ang kanyang birthday gift, pero alam naman kasi ni Kathryn kung gaano sila pareho ka-busy at talagang walang panahon na makabili ng isang gift si Daniel.

Palagay namin, mas gugustuhin naman ni Kathryn na hindi nga siya mabigyan agad ng birthday gift ni Daniel kaysa malaman niyang may inutusan lang iyong iba para ibili siya ng regalo. Much worst kung kagaya ng iba na ang producers o managers pa ang talagang bumili ng regalo para lang magkaroon ng publisidad.

Noon ding birthday ni Kathryn, hindi lamang si Daniel kundi ang buong pamilya niyon ay sumama sa isang celebration at vacation na rin sa Palawan. Hindi ba mas romantic naman iyon? Palagay namin kahit namulot lang ng kabibe sa dagat si Daniel at ibinigay iyon kay Kathryn mas magiging meaningful pa eh, kasi magkasama sila.

Hindi ba iyon naman ang talagang mahalaga sa isang relasyon, iyong pagsasama? May relasyon nga kayo pero magtatapat lang sa iyo at magbibigay ng regalo kung nasa kalagitnaan kayo ng isang concert, hindi ka ba magdududa niyon?

Iyong nakikita naming relasyon niyang KathNiel, mas naniniwala kami na may relasyon silang totoo kaysa ibang love teams na sa palagay namin puro put on eh. May mga sobrang romantic kunwari pero iyong lalaki ilang beses na naming nakasalubong sa Makati na iba ang kasama sa dinner. Mag-iisip ka tuloy eh, bakit hindi iyong sinasabi niyang syota niya ang date niya. Ano iyon, “public relations” lang?

HATAWAN  – Ed de Leon